مندر کا بھنڑارا کھانا ؟

بسم اللہ الرحمن الرحیم

دارالافتاء گلزارِ طیبہ، گجرات
الجواب بعون الملک الوہاب

مسئلہ:
کیا مسلمانوں کے لئے مندروں میں دیوتاؤں پر چڑھائی گئی مٹھائی (بھندارہ / پرساد) کا لینا یا کھانا جائز ہے؟

---

الجواب:
فقہائے اہلِ سنّت کے نزدیک دیوتاؤں پر چڑھائی گئی مٹھائی وغیرہ فی نفسہٖ حرام نہیں ہو جاتی، البتہ چونکہ ہندو حضرات اس کو بطورِ تبرک تقسیم کرتے ہیں، اس لئے مسلمانوں کے لئے اس سے اجتناب (بچنا) اولیٰ و بہتر ہے۔

چنانچہ صدر الشریعہ
مفتی امجد علی اعظمی
فرماتے ہیں:

"جو مٹھائی وغیرہ بتوں پر چڑھاتے ہیں اگرچہ وہ حرام نہیں ہو جاتی، تاہم اس سے اجتناب اولیٰ ہے کہ وہ اسے تبرک سمجھ کر تقسیم کرتے ہیں، اور بت پر چڑھنے کے بعد کوئی چیز تبرک نہیں ہو سکتی۔"
(فتاویٰ امجدیہ، ج 4، ص 59)

اسی طرح
امام احمد رضا خان
تحریر فرماتے ہیں:

"حلال ہے مگر احتراز چاہئے نسبتِ خباثت کی وجہ سے۔"
(فتاویٰ رضویہ، ج 21، ص 606)

لہٰذا ایسی مٹھائی کا لینا جائز ہے، مگر بچنا بہتر و مستحسن ہے۔

---

خلاصۂ کلام:
موجودہ زمانہ میں مسلمان اکثر دیہات میں کم آبادی کے ساتھ رہتے ہیں، ایسی صورت میں اگر غیر مسلم حضرات کچھ پیش کریں اور انکار کرنے میں باہمی تعلقات کی خرابی یا کسی قسم کے ضرر کا اندیشہ ہو، تو لے لینا جائز ہے؛ بعد میں خود نہ کھا کر کسی اور کو دے دیں، یا اگر خود کھا بھی لیا تو موجبِ گناہ نہیں۔
تاہم بلا ضرورت احتراز کرنا ہی افضل ہے۔

---

واللہ اعلم بالصواب
ورسولہ اعلم عزوجل ﷺ

کتبہ:
مفتی ابو احمد ایم جے اکبری
قادری حنفی
دارالافتاء گلزارِ طیبہ، گجرات
بتاریخ: 21/02/2026

---